準備材料: 蛋,豆腐及鮮腐皮
經過鹵水嘅洗禮佢地就變成好味嘅鹵水併盤啦!
我有時想偷懶就會用鹵水整餸,最方便就係煮鹵水蛋同雞翼喇,煮番滾D鹵汁,再放哂材料落去,煮5分鐘後熄火,就吾使再理佢,食飯時番熱佢就得,真係好慳功夫架,不過今次要鹵嘅係豆腐同腐皮就吾同,因為兩樣都要先炸一炸佢先至可以放落鹵汁裡面,如果吾係佢地就好易會炆到散哂架啦!
冬菇3隻浸軟後切成小粒,用一匙素蠔油(我只用普通蠔油)及些少生粉拌勻
鮮腐皮兩張重疊擺放,中間放入冬菇粒,再摺疊成大概8吋長3吋闊的長條形,再用綿繩扎實(不可以太鬆)
放入熱油炸至四面轉脆,(過程好快,只需一兩分鐘)
炸好後放入鹵汁中用小火煮最少45分鐘,煮至整條腐皮變軟後撈起,攤涷,涷後才剪去綿繩及切件,食時淋上鹵汁即可
板豆腐一磚,切成適當大小,沖洗後吸乾水份,放入油鍋炸至金黃,就可放入鹵汁中炆煮20分鐘,熄火再浸至少2小時
攤涷後切成小件
炸豆腐嘅油溫一定好熱,豆腐先至脆,豆腐入油鍋後吾好攪動佢,等佢炸一陣成形後先至好攪動,如果吾係佢就好易散啦!
因為炸腐皮嘅油吾需要太熱,所以可以先炸腐皮才再炸豆腐
由於腐皮要入鹵汁炆煮45分鐘,所以扎綿繩時一定要扎實,如果吾係佢就會喺炆煮期間鬆開哂,就變成一鍋腐皮啦!
素鴨鹵好後要攤涷後才好去剪綿繩,因為鹵完撈上來時本身軟淋淋,剪繩會好容易整散素鴨嘅形狀,攤涷後佢已成形就吾怕整散佢啦!
