超級簡單的焦糖核桃

我家從來都未試過無核桃架,因為老公實在太鍾意食佢啦,所以好多時候我都會用佢嚟整嘢食,好似麵包,蛋糕,糖水,甜品咁,通通都會用到核桃,今次我就用佢嚟整左一個小食"焦糖核桃",呢個小食好容易,材料就只係砂糖同核桃咁簡單,真係人人都可以做得到架!

上次去華埠買餸,老公話佢好想食焦糖核桃,問我識吾識整,我從未整過呀,不過點樣整焦糖我就知,所以我諗焦糖核桃咪係煮好焦糖拌入核桃咁簡單囉!希望我無估錯啦!

其實基本上煮食時我都吾會量度份量,大部份都靠經驗啦(其實係靠估!!)家庭煮婦麻...係咁架啦,吾通煮咩都成日量住幾多毫克,幾多安士咩!好似今次我整呢個焦糖核桃都無量度過份量,一碗半核桃,我大概就用左一碗砂糖

做法好簡單:

1. 核桃用滾水焯1分鐘,倒出吸乾乾水份,放入焗爐焗至核桃香味出來,(我用180c焗了大概10分鐘,再用145c焗5~10分鐘)

2. 砂糖倒入平底易潔鍋,用小火煮溶成金啡色糖漿,煮時不要攪拌它,讓糖慢慢溶解,見有不均勻時才用木匙拌勻即可,小心不要煮過久,否則糖漿會有苦澀味

3. 當砂糖全部溶成金啡色焦糖後,熄火,放入已焗好的核桃快手拌勻,動作一定要快,因為蕉糖會好快會變脆

4. 把焦糖核桃倒入錫紙上攤暖,當核桃降至微溫時可用手把宅掰開成小塊,或待完全攤涷後用刀切成小塊亦可

營養講座:核桃又稱合桃,它含豐富奧米加三脂肪酸,能為腦部細胞提供重要元素,所以它的對腦部很有益處,不過在營養學上,它最大的功能是幫助降低壞膽固醇及血壓,科學研究證實,核桃在降膽固醇的功效,比深海魚及橄欖油更超卓!